۱۹ـ فریاده گلین
فریاده گلین نازلی نیگاریم گئدیر الدن
همدم اولوب اغیاریله یاریم گئدیر الدن
رفتاری گوزه ل نطقی گوزه ل باخماسی گوئچک
اهو کیمی باخدیقجا قراریم گئدیر الدن
حسرتله قالارگوزلریم اخر دالیسیجا
هئجران یلی اسدیکجه باهاریم گئدیر الدن
ناز ائله سه نازین چکرم ائول دیسه اوللم
یوخ چاره یولوم شعرو شعاریم گئدیر الدن
آواره قالان من غم عشقینده یانان من
اخر نه دیئم دارو نداریم گئدیر الدن
زولفون توکوب اطرافه گئیب رخت عروسی
اماده اولوب گئتمگه یاریم گئدیر الدن
